Nunatsinni katersugaasiveqarnerup suliassai inatsisartut inatsisaani nr. 6-imi oktoberip 30-iani 1998-imeersumi nalunaarneqarput. Inatsit taanna ilassutitaqarpoq 21. maj 2004-iminngaanneersoq. Inatsisit taakku nunatta piorsarsimassutsikkut kingornussaasa tammatsaalineqarnissaat nunatsinnilu katersugaasiveqarnikkut sulinerup suleqatigiinnerullu siuarsarneqarnissaa nalunaarpaat.

Nunatta Katersugaasivia Allagaateqarfialu (NKA) aamma allanik suliassaqarpoq, ilaatigullu taakku Qanganitsanut eqqaassutissat imaaliinnarlugit peerneqarsinnaanngitsut illullu eqqissisimatinneqarnerat pillugu Inatsisartut inatsisaa nr. 18, 19. november 2007-imeersoq malillugu sulilluni.

Allagaateqarfiup suliassai inatsimmi Allagaateqarfeqarneq pillugu inatsisartut inatsisaat nr. 22, 30. oktober 1998-imeersumi nalunaarneqarput. Tassani ilaatigut toqqortat oqaluttuarisaanermi immikkut eriagisassat suliarineqarnissaat eqqaaneqarpoq. Allagaateqarfik allagaatinut toqqortanut pisortat toqqorsiviinit taavalu toqqorsivinnit namminersortunit pissarsiat katersorneqarnissaannut, aaqqissuunneqarnissaannut, toqqortarineqarnissaannut nalunaarsorneqarnissaannullu akisussaavoq, taavalu toqqortat pissarsiarineqartut aallaavigalugit ilisimatusarnermik ingerlatsisussaalluni. Taamattaaq nunatta piorsarsimassutsikkut inuiaqatigiillu oqaluttuarisaanerannik ineriartornerannik ilisimanninneq siuarsartussaavaa.

Tamakku qulaani taaneqartut saniatigut NKA allanik suliaqartuuvoq, tamakkulu ilaatigut inatsisini allani soorlu pinngortitaq pinngortitallu atorneqarneranik inatsimmi allassimasut malillugit suliaqarluni.