Katersugaasivik

Katersugaasivik 1960-ikkunni aallartisarneqalerpoq. Tamatuma kingorna katersugaatit amerliartortinneqarput nammineq katersinikkut, assaasarnertigut taavalu Qallunaat Nunaanni Nationalmuseum-ip nunatsinnut utertitaasigut. Katersugaasivimmit nuna tamakkerlugu itsarnisarsiornikkut assaasoqartarpoq, taamattaarlu suliassaasa ilagaat oqaluttuarisaaneq nutaanerusoq, taavalu eqqumiitsuliornermik sanaluttarnermillu pilersitat katersugaralugit ilisimatusarfiginissaat. Katersugaasivimmi illut allanngutsaaliukkat taavalu takussutissat itsarnitsat qitiusumik nalunaarsuusiorfigineqartarput, katersugaasiviullu suliaasa ilagaat allanngutsaaliuinermik illunillu innerlernaveersaagassanut inatsimmi aalajangersakkat tunngavigalugit malinneqarnissaat isumagissallugu. Aammattaaq pinngortitap allanngutsaaliornissaani illoqarfinnilu pilersaarusiorneq peqataaffigisarpaa.

Najugaq: Nunatta Katersugaasivia Allagaateqarfialu Hans Egedesvej 8, Box 145 3900 Nuuk


Katersugaasiveqqat

Sinerissami katersugaasiviit illoqarfinni assigiinngitsuni inissisimasut 15-iupput. Tamakku illoqarfiup qanganisartaani inissisimagajupput.

Katersugaasiveeqqat akuerisaasut ingerlanneqarnerat kommunip isumagisassaraa, massakkullu katersugaasiviit akuerineqartut tassaapput:
Nanortalik, Qaqortoq, Narsaq, Paamiut, Maniitsoq, Sisimiut, Aasiaat, Qasigiannguit, Ilulissat, Qeqertarsuaq, Uummannaq, Upernavik, Qaanaaq aamma Tasiilaq.
Katersugaasiviit taakku suliassaasa ilagaat assaanerit, oqaluttuarisaanermut pingaarutilinnik katersinerit paasiniaanerillu, saqqummersitsinerit paasisanillu siaruarterinerit.

Nittartagaq: www.museum.gl